இயற்கை வேளாண்மை - 11 - மகசூல் கூட்டும் மந்திரம் பஞ்சகவ்யா!

ப ஞ்சகவ்யா தயாரிப்பு, அதில் உள்ள சத்துகள் குறித்துக் கடந்த இதழில் பார்த்தோம். தற்போது, பஞ்சகவ்யாவின் பயன்பாடு மற்றும் பலன்கள் குறித்துப் பார்க்கலாம். . ஆயுர்வேதத்தில் ‘கவ்பதி’ என்ற சிகிச்சைக்குப் பஞ்சகவ்யாவைப் பயன்படுத்தி இருக்கிறார்கள். அதில் சாணம், மாட்டுச் சிறுநீர், பால், தயிர் மற்றும் நெய் ஆகிய ஐந்து பொருள்கள் பஞ்சகவ்யா தயாரிக்கப் பயன்படுத்தப்பட்டது. சாணம், சிறுநீர், பால் ஆகிய மூன்றும் தலா அரைப் பங்கு, தயிர், நெய் ஆகிய இரண்டும் தலா ஒரு பங்கு கலந்து தயாரிக்கப்பட்ட பஞ்சகவ்யாவை ஆயுர்வேத மருத்துவத்தில் பயன்படுத்தி இருக்கிறார்கள். இது மனிதனுக்கு நோய் எதிர்ப்பு சக்தி கொடுப்பதற்காகப் பயன்படுத்தப்பட்டிருக்கிறது.

. பஞ்சகவ்யா எனப் பெயர் வைப்பதற்கு முன்பே, இது ஆயுர்வேத பயன்பாட்டில் இருந்திருக்கிறது. இதைப் பற்றி ஆயுர்வேத நூல்களில் ஒன்றான ‘ஆரிய பிஷாக்’ என்ற நூலில் எழுதப்பட்டிருக்கிறது. வித்யா சாகர் தேஷ்பதா என்பவர் எழுதிய அந்த நூலில் ‘கோ வித்யாக்’ என்ற பகுதியில் இதன் பயன்பாடு பற்றிய குறிப்பு இருக்கிறது. மாடுகளிலிருந்து நேரடியாகவும் (சாணம், சிறுநீர், பால்) மறைமுகமாகவும் (தயிர், நெய்) கிடைக்கும் இந்தப் பொருள்கள் மருந்துகளின் ஆதாரப்பொருள்களாகவும், பண்டைய நாகரிகத்தில் நோய்தீர்க்கும் மருந்தாகவும் ஆயுர்வேதம் நம்பியது. ‘ஆரிய பிஷாக்’ நூலைத்தழுவி எழுதப்பட்ட பிற வேத நூல்களில் இதன் விவசாயப் பயன்பாடும் குறிப்பிடப்பட்டுள்ளது. குறிப்பாக ‘விருக்ஷாயுர்வேதம் ’ (விருக்ஷா-பயிர்கள்; (ஆ)யுர்வேதா-நலம்) என்ற நூலில் பஞ்சகவ்யா பயிர்களுக்குப் பயன்படுத்துவது பற்றிக் குறிப்பிடப்பட்டுள்ளது. இடையில் இயற்கை உரங்களைப் பயன்படுத்த மறந்தது போலவே, பஞ்சகவ்யா பயன்பாட்டையும் மறந்துவிட்டனர். தற்போது மீண்டும் பயன்பாட்டில் இருக்கிறது.

. பயன்கள்

அறிவியல் வளர்ச்சியில் பயிர் வளர்ச்சி ஊக்கி, பூச்சி, நோய்த் தடுப்பு மருந்தாகப் பல்வேறு மருந்துகள் (டானிக்குகள்) பயன்படுத்தப்படுகின்றன. ஆனால் வேத காலத்திலிருந்து இலைவழித் தெளிப்பானாகப் பயன்பாட்டில் இருப்பது பஞ்சகவ்யா மட்டும்தான். இதைப் பயன்படுத்துவதால் பயிர்களுக்கு எதிர்ப்பு சக்தி அதிகரிப்பதோடு இலைகளின் அடர்த்தியும் கூடுகிறது. அனைத்து வகையான பயிர்களும், சூரியஒளியின் துணையுடன் இலைகளின் வழியாக ஒளிச்சேர்க்கை நிகழ்வை நடைபெறச்செய்து உணவு தயாரிக்கின்றன. அதே நேரம் பெரும்பாலான பூச்சிகள் முதலில் தாக்குவது இலைகளைத்தான். அதனால் இலைகள் சுருங்கியும், வெட்டப்பட்டும், பச்சையம் சுரண்டப்பட்டும் இலைப்பரப்பளவு குறைகிறது. அதனால் உணவு (ஸ்டார்ச்) உற்பத்தி செய்யும் திறன் குறைந்து, பயிர்களில் சத்துகள் நிலைநிறுத்தும் திறனும் குறைந்து மகசூல் பாதிக்கப்படுகிறது. பஞ்சகவ்யா பயன்படுத்துவதன் மூலம், இதனைத் தடுக்கலாம். இலைகளில் இதனைத் தெளிக்கும்போது, இலையின் பரப்பு அதிகமாகிறது. இலைகளின் எண்ணிக்கையும் அதிகரிக்கிறது.

. இதனால், அதிக அளவு உற்பத்தியாகும் ‘குளோரோஃபில்’ எனப்படும் பச்சையத்தின் ஒருசேர் பரவலால் இலைப்பரப்பு முழுவதும் அடர் பசுமை உறுதிப்படுத்தப்படுகிறது. இதன் மூலம், பயிர்களில் வேதிவினையியல் மாற்றங்கள் நடைபெற்றுப் பூக்களை உருவாக்கும் ஹார்மோன்கள் (வளர்ச்சி ஊக்கிகள்) தூண்டப்படுகின்றன. பூக்களும் காய்களும் அதிக அளவு உருவாகின்றன.

. வேர்கள் மண்ணில் உள்ள சத்துகளை எடுத்துப் பயிருக்கு அனுப்புகின்றன. வேர்களின் நீர், உரங்களின் சேகரிப்பு மற்றும் மண்ணிற்கு மேலே உள்ள பயிர்களுக்கான கடத்தும் திறன் ஆகியவற்றைப் பொறுத்தே மகசூல் நிர்ணயிக்கப்படும். பஞ்சகவ்யா வேரூட்டம் செய்யும்போது, வேர்களில் அதிக கிளைகளை உருவாக்கும். நெருக்கமான திடமான வேர்கள் உருவாகும். இதனால் மண்ணிலிருந்து அதிக சத்துகள் பெறப்பட்டு மேலே கடத்தப்படும். அதன் மூலமும் அதிக பூக்களும், காய்களும் உருவாகும்.

. அதேபோல இலைகளில் சின்னச் சின்னத் துவாரங்கள் இருக்கும். பகல் நேர வெயிலில் அந்தத் துவாரங்கள் விரிவடையும். அப்போது அந்தத் துவாரங்கள் வழியாக இலைகளில் இருக்கும் நீர்ச்சத்து ஆவியாகும். அதிக அளவு நீர் ஆவியாகும்போது, பயிர்கள் வாடும். ஆனால், பஞ்சகவ்யா தெளிக்கும்போது இலைப்பரப்புகளின் மேலே மெல்லிய கண்ணாடிப்போர்வைகள் உருவாகி, இலைத்துவாரங்களைத் திரைபோல் மறைத்துவிடும். வழக்கம்போல் இலைத்துவாரங்களின் வழியே பயிர் சுவாசம் நடக்கும். ஆனால் நீர் ஆவியாவது தடுக்கப்படும். பயிர்களின் நீர் மற்றும் சத்துகள் வீணாவது தடுக்கப்பட்டு, வறட்சியைத் தாங்கும் சக்தி தூண்டப்பட்டு நிலைநிறுத்தப்படுகிறது.

. பூக்கள் அனைத்தும் பிஞ்சுகளாகும்

மல்லிகைப்பூவின் வாசத்தை (மணம்) அதிகரிப்பதற்கும், மொக்குப் புழுத் தாக்குதலைத் தடுப்பதற்கும் பஞ்சகவ்யா பயன்படுகிறது. பஞ்சகவ்யாவின் வாசனை, பூ மொக்குப்புழுவின் தாய்ப்பூச்சிகளுக்குப் பிடிக்காத ஒன்று. அதனால் அந்த வாசனை இருந்தால் அந்தப் பக்கமே தலை வைத்துப் படுக்காது. அதோடு இதைப் பயன்படுத்துவதால் ஆண்டு முழுவதும் பூப்பூக்கும். கொய்யாவில் பூப்பூக்க, பிஞ்சு நிலைக்க, சிறந்த வாளிப்பான காய்களைப் பெறப் பஞ்சகவ்யா பயன்படுத்தப்படுகிறது. இந்தத் தொடர் பயன்பாட்டினால், கொய்யாப் பழங்களை அதன் வழக்கமான சேமிப்புக் காலத்தைக் கடந்து ஐந்து நாள்கள் அதிகமாகச் சேமிக்க முடிகிறது. இதுபோல் அனைத்து பழவகை பயிர்களுக்கும் மிகுந்த பயனைத்தருகிறது. மாம்பழத்தில் மணம், சுவையை அதிகப்படுத்துகிறது. பொதுவாக மா மரத்தில் ஆண் பூக்கள் 80 சதவிகிதம், இருபால் பூக்கள் 20 சதவிகிதம் இருக்கும். ஆண்பூக்கள் மகரந்தம் தருவிக்க மட்டுமே. அதனால், கொத்தாகப் பூக்கிற அத்தனை பூக்களும் பிஞ்சாகி, காயாகி, கனியாகி விடாது. இந்த 20% இருபால் பூக்களில் உள்ள பெண்பூக்கள் மட்டுமே காய்களை உருவாக்கும். பஞ்சகவ்யா பயன்படுத்தும்போது, பெரும்பாலான பெண் பூக்கள் காயாக மாறுகின்றன. மேலும் பளபளப்பான சந்தைத்திறனுடைய மாம்பழங்களும் கிடைக்கும். இவை அனைத்தும் பல்வேறு ஆராய்ச்சிகளின் முடிவுகளாகும்.

. மண்ணில் அதிகரிக்கும் நுண்ணுயிரிகள்

இதைத் தரை வழியாகக் கொடுக்கும்போது, மண்ணில் நுண்ணுயிர்கள் அதிகமாகின்றன. இதனால் ஒரு கட்டத்தில் மண்ணில் உரத்தேவை குறைகிறது. வேர், தண்டு, இலையென அனைத்துப் பகுதிகளிலும் இது வளத்தை உருவாக்குவதால் நல்ல மகசூல் கிடைக்கிறது. இதன் அறிவியல் சூத்திரத்தை முழுவதும் பின்பற்றித் தயாரிக்கப்படும் சந்தைப்பொருள்களைத் தரம் அறிந்து வாங்கிப் பயன்படுத்த வேண்டும். அல்லது அறிவியலை நன்கு உள்வாங்கி, பஞ்சகவ்யா தயாரிக்கும் முறையைத் தெரிந்துகொண்டு விவசாயிகளே உருவாக்கிக்கொள்ளலாம். இதன் மூலம் இடுபொருள் செலவைக் குறைக்கலாம்; மகசூலை அதிகரிக்கலாம்.

. இதைப் பயன்படுத்துவதால் அறுவடை காலமும் சற்று குறையும். வழக்கமாக 100 நாள்களில் அறுவடை செய்ய வேண்டிய பயிரை 80-90 நாள்களில் அறுவடை செய்யலாம். மீன் பண்ணைகளிலும் பஞ்சகவ்யாவைப் பயன்படுத்தும்போது, மீன் தொட்டிகளின் அடியில் உள்ள பாசி, செடிகள் நன்றாக வளர்கின்றன. இதன் மூலம் மீன்களுக்கு நல்ல உணவு கிடைக்கிறது. பண்ணையாளர்களுக்கு நல்ல மகசூலும் வருவாயும் கிடைக்கிறது.

. கால்நடைகளுக்கான அளவு

மண்புழு உரத் தயாரிப்புப் படுக்கைகளில் பஞ்சகவ்யா தெளிக்கும்போது, புழுக்கள் அதிகம் உருவாகின்றன. மண்புழுக்களும் விரைவாக வளர்கின்றன, மேலும் மண்புழு உரப்படுக்கையில் இடப்பட்ட பொருள்கள் விரைவில் மட்கி உரமாகின்றன. கோழிகளுக்குத் தினமும் ஒரு கிலோ தீவனத்தில் 5 மி.லி பஞ்சகவ்யா கலந்து கொடுத்தால் நோய் எதிர்ப்பு சக்தி அதிகரிக்கும். எடையும் கூடும். ஒரு ஆட்டுக்கு ஒரு நாளைக்கு 10 மி.லி, மாட்டுக்கு 100 மி.லி கொடுக்கலாம். ஆடு, மாடுகள் தண்ணீர் குடிக்கும்போது அதில் கலந்துவிடலாம். பன்றி பண்ணை வைத்திருப்பவர்கள், பன்றிக்கு ஒரு நாளைக்கு 20 மி.லி கொடுக்கலாம். கால்நடைகளுக்குப் பஞ்சகவ்யா கொடுக்கும்போது, அதன் வளர்ச்சி விகிதம் அதிகரிக்கிறது. நோய் எதிர்ப்பு சக்தி கிடைக்கிறது. சுருக்கமாகச் சொன்னால் தடுப்பூசிபோலப் பஞ்சகவ்யா பயன்படுகிறது. மேலும் பசியையும் தூண்டுகிறது. செரிமானத்தை அதிகரிப்பதோடு உடலிலிருந்து தேவையில்லாத நச்சுக்களையும் வெளியேற்றிவிடுகிறது.

.இயற்கை வேளாண்மை : 10 - பயிர்களின் காவலன் பஞ்சகவ்யா.... பயன்படுத்தும் முறை

இலைவழித் தெளிப்பாகப் பயன்படுத்தும்போது, 10 லிட்டர் தண்ணீருக்கு 300 மி.லி பஞ்சகவ்யா கலந்து பயன்படுத்த வேண்டும். சொட்டுநீர்ப் பாசனத்தில் வெஞ்சுரி (உரத்தொட்டி) வழியாகக் கொடுக்கும்போது, ஒரு ஏக்கருக்கு 20 லிட்டர் பஞ்சகவ்யாவை உரத் தொட்டியில் கலந்து விட வேண்டும். விதைநேர்த்தி செய்வதற்கு ஒரு லிட்டர் தண்ணீரில் 30 மி.லி கலந்து கொள்ளலாம். 20 நிமிடம் மட்டுமே அதில் விதைகளை அல்லது வேர்களை நனைக்க வேண்டும். கீரை போன்ற 30 நாள்களில் பூக்கும் முன் அறுவடை செய்யும் தாவரங்களுக்கு 10 நாள்கள் இடைவெளியில் 2 முறை தெளிக்கலாம். பூக்கும் தாவரங்களுக்குப் பூ எடுக்கும் வரை 15 நாள்கள் இடைவெளியில் தெளிக்க வேண்டும். பூ எடுத்தபிறகு 10 நாள்களுக்கு ஒரு முறை தெளிக்க வேண்டும். இதிலும் இரண்டு அல்லது மூன்று முறை தெளித்தால் போதும். காய் உருவான பிறகு ஒரே ஒரு முறை தெளிக்க வேண்டும்.

. ஒருமுறை தயாரித்த பஞ்சகவ்யாவை 6 மாதங்கள் வரை வைத்துக்கொள்ளலாம். அதில் உள்ள நுண்ணுயிர்கள் பெருகிக்கொண்டே இருக்கும். அவை அதிக அளவு பெருகிக்கொண்டே இருக்கும்போது அதற்கான உணவு அங்கே இருக்காது. அதனால் ஆறு மாதத்திற்குள் பயன்படுத்தி விட வேண்டும்.

-வளரும்

. பாதுகாப்பு

த யாரிக்கப்பட்ட பஞ்சகவ்யா கரைசலை வெயிலில் வைக்கக் கூடாது. நிழலில் மூடி வைக்க வேண்டும். ஒருநாள் விட்டு ஒருநாள் மூடியைத் திறந்து வலது மற்றும் இடது புறம் தலா 7 சுற்று நன்கு கலக்கி விட வேண்டும். நாம் மூடியை மூடியே வைத்திருக்கும்போது அதற்குத் தேவையான ஆக்சிஜனைத் தண்ணீரிலிருந்து எடுத்துக் கொள்கிறது. தண்ணீரின் மூலக்கூறான ஆக்சிஜன் பிரிந்த பிறகு நீர் கெட்டியாக மாறிவிடும். அளவு குறைந்துகொண்டே வரும். பஞ்சகவ்யா தயாரிக்கும் தண்ணீர், நல்ல தண்ணீராக இருக்க வேண்டும். உப்புத் தண்ணீராக இருக்கக் கூடாது. வெயில் நேரத்தில் பஞ்சகவ்யாவைத் தெளிக்கக் கூடாது. முறையாகத் தயாரிக்கப்பட்ட பஞ்சகவ்யாவை வாங்க விரும்புபவர்கள் ஐ.எஸ்.எஸ்.ஓ சான்று பெற்றவர்களிடம் வாங்கலாம். அல்லது சொந்தமாகத் தயார் செய்துகொள்ளலாம். சிறந்த முறையில் தயார் செய்யப்பட்ட பஞ்சகவ்யாவை அதன் தரம் குறையாமல் 6 மாதங்கள் வைத்துக்கொள்ளலாம். அதன் பிறகு நுண்ணுயிர் பெருக்கம் குறையத்தொடங்கும். அல்லது பிற மாற்றுச் சேகரிப்பானின் மூன்று பங்கு பிரித்துப் போட்டு இளநீர், கரும்புச்சாறு, வாழைப்பழம், ஈஸ்ட் ஆகியவை சேர்த்து மாட்டுச்சிறுநீர் மற்றும் நல்ல தண்ணீர் சம அளவு கொண்டு நிரப்பி நுண்ணுயிர் பெருக்கத்திற்கு வகை செய்யலாம். ஆனால் முதல் தயாரிப்பின் சிறப்பான விளைவுகளை இரண்டாம் தொடர் தயாரிப்பில் பெற முடியாது.

. அதிகரிக்கும் மகசூல்!

ப ஞ்சகவ்யா பயன்பாட்டினால் 18 முதல் 22 சதவிகிதம் மகசூல் அதிகரித்துள்ளது. காய்கறிப் பயிர்களில் 18 சதவிகிதம், மஞ்சள் போன்ற கிழங்கு வகைப் பயிர்களில் 22 சதவிகிதம் மகசூல் அதிகரித்துள்ளது. இது பல்வேறு ஆராய்ச்சிகளில் நிரூபிக்கப்பட்டுள்ளன. அதேபோல இயற்கை விவசாயத்தில் விளையும் பொருள்களில் நல்ல பளபளப்புத் தன்மையைக் கொடுப்பதற்கும் பஞ்சகவ்யா பயன்படுகிறது. இது பழங்களின் அளவு, எண்ணிக்கையை அதிகப்படுத்துகிறது. வாழைப்பழத்தின் சேமிப்புக் காலத்தை அதிகமாக்குகிறது. நெல், சோளம், மக்காச்சோளம் போன்ற பயிர்களில் 10-15 நாள்கள் அறுவடையை முன்னதாகவே மேற்கொள்ள முடிகிறது.

புதிய தொடர்: இயற்கை வேளாண்மை

அறிவியல் - 2 : சாணத்தில் இத்தனை சத்துகளா? ஆச்சர்யப்படுத்தும் அறிவியல்!

அறிவியல் - 3 : மலைக்க வைக்கும் மாட்டுச் சிறுநீர்!

இயற்கை வேளாண்மை : 4 - மகசூலைக் கூட்ட உதவும் பசுந்தாள் உரம் + தொழுவுரம்!

இயற்கை வேளாண்மை : 5 மண்ணையும் மாற்றும் தென்னைநார்க் கழிவு உரம்!

இயற்கை வேளாண்மை 6: கோடை உழவு... கோடி நன்மை!

இயற்கை வேளாண்மை : 7 மண்ணை வளமாக்கும் மண்புழு!

இயற்கை வேளாண்மை: 8 - மண்ணை விரைவில் வளமாக்கும் மண்புழு உரம்!

இயற்கை வேளாண்மை : 9 - நல்ல மகசூலுக்கு உதவும் உயிர் உரங்கள்!

இயற்கை வேளாண்மை : 10 - பயிர்களின் காவலன் பஞ்சகவ்யா...

இயற்கை வேளாண்மை - 12: பயிர்களின் தற்காப்பு கவசம் தசகவ்யா!

இயற்கை வேளாண்மை 13 : வேம்பு... பயிரைக் காக்கும் போராளி!

இயற்கை வேளாண்மை 14 : வேப்ப எண்ணெய்... பூச்சிகளுக்கு வில்லன் பயிர்களுக்கு நண்பன்!