ஐந்து வகை பிராவிடன்ட் ஃபண்டுகள்! - அள்ளித் தரும் வாய்ப்புகள்..!

`இ ன்றைக்குக் கையில் கிடைத்திருக்கும் 100 ரூபாயில், எத்தனை ரூபாயைத் தக்கவைத்துக் கொண்டால், நாளைய பணத் தேவையைச் சமாளிக்கப் போதுமானதாக இருக்கும்...’ என்ற சிந்தனையை நம்மிடையே பரவலாக்கி, நம்மையெல்லாம் பணக்கணக்குப் போடவைத்திருக்கிறது கொரோனா! . நாளைய பணத் தேவையின் முக்கியத்துவத்தை உணர்ந்து, 85 ஆண்டுகளுக்கு முன்னர் உருவாக்கப்பட்டதே ‘பிராவிடன்ட் ஃபண்ட்’ என அறியப்படும் முதன்மை ஓய்வுக்கால நிதியமான வருங்கால வைப்புநிதி. சுருக்கமாக, இதை `பி.எஃப்’ என்று குறிப்பிடுவது நடைமுறை.

. அன்றைக்கு உருவாக்கப்பட்ட பி.எஃப்., இன்றைய தேதியில் ஐந்து வகைகளாக உள்ளது. அவற்றுள் ஒவ்வொரு பி.எஃப்-க்குமான சந்தா தொகையின் சதவிகித அளவு, வட்டி விகிதம், வட்டி கணக்கிடும் முறை, வரிச் சலுகை, வருடாந்தர வளர்ச்சி, வாரிசு உரிமை போன்ற அம்சங்கள் ஒன்றுக்கொன்று வேறுபடுகின்றன. அதுமட்டுமன்றி, ஒவ்வொரு பி.எஃப்-க்குமான விதிமுறைகள் அவ்வப்போது புதுப்பிக்கப்பட்டும்வருகின்றன. எனவே, இந்த ஐந்து பி.எஃப் வகைகள் பற்றி நன்கு தெரிந்துகொள்வோம்.

பி.எஃப்-ன் சிறப்பம்சங்கள்

சேமிக்கும் பணத்துக்கு எந்த வகையிலும் பங்கமில்லாத நம்பர் ஒன் பாதுகாப்பு ஒன்று உண்டென்றால், அது பிராவிடன்ட் ஃபண்டுதான். ஏனென்றால், புயல், வெள்ளம், பூகம்பம் போன்ற எந்தவொரு இயற்கைப் பேரிடரை முன்னிட்டும் பணம் தருவது தடைப்படாத நிதியம் பி.எஃப். வேலையிலுள்ள ஊழியர் ஒருவர் பணியிடை நீக்கத்துக்கு உட்பட்டாலும், ‘டிஸ்மிஸ்’ செய்யப்பட்டாலும் இதர நிதியங்கள் வந்து சேர்வதில் தடைகள், தாமதம் குறுக்கிடலாம். அப்போதும்கூட கைகொடுக்கக் காத்திருப்பது பி.எஃப்-ஆகவே இருக்கும்.

இனி, ஐந்து வகையான பி.எஃப்-களை ஒவ்வொன்றாகப் பார்ப்போம்.

. இ.பி.எஃப்

பிராவிடன்ட் ஃபண்ட் என்று சொன்னாலே, அது தொழிலாளர் வருங்கால வைப்பு நிதியான இ.பி.எஃப் நிதியைத்தான் குறிக்கும். ஏனெனில், இதர பி.எஃப்-களை விட அதிக எண்ணிக்கையில் உறுப்பினர்களைக் கொண்டது இ.பி.எஃப். தற்போது செயல்பாட்டி லிருக்கும் சந்தாதாரர் எண்ணிக்கை சுமார் ஆறு கோடி.

. பொதுத்துறை நிறுவனங்கள், தனியார்துறை நிறுவனங்கள், தொழிலகங்கள், தோட்டங்கள் எண்ணெய் வயல்கள், சுரங்கங்கள், உணவு விடுதிகள், வணிக நிலையங்களில் எங்கெல்லாம் பணியாளர்களின் எண்ணிக்கை இருபதோ அதற்கு மேலுமோ இருந்தால், அப்பணியாளர்களுக்கு இ.பி.எஃப் என்பது கட்டாயம். இருபதுக்கும் குறைவான ஊழியர்களுள்ள நிறுவனங்கள், விருப்பத்தின் பேரில் இ.பி.எஃப்-ல் இணையலாம்.

1952-ல் அமலாக்கம் பெற்ற இ.பி.எஃப்-ஐ தொழிலாளர் வைப்புநிதிக் கழகம் (Employees Provident Fund Organisation) நிர்வகித்துவருகிறது. மத்திய, மாநில அரசுத் தரப்பு அதிகாரிகளும், ஊழியர் தரப்புப் பிரதிநிதிகளும் நிர்வாகத்தில் பங்கேற்கின்றனர். அங்கீகரிக்கப்பட்ட இந்த இ.பி.எஃப் நிதியத்தில் நேற்றுவரை வேலைக்குச் சேர்ந்த ஊழியர்களும், நாளை சேரப் போகும் ஊழியர்களும் இ.பி.எஃப் உறுப்பினர் ஆகலாம்.

. ஜி.பி.எஃப்

மத்திய, மாநில அரசு ஊழியர்களுக்கு உரியது, பொது வருங்கால வைப்புநிதி எனப் பொருள்படும் `ஜி.பி.எஃப்.’ மத்திய அரசு ஊழியர்களுக்கான ஜி.பி.எஃப் கணக்குகள் மத்திய அரசாலும், மாநில அரசின் ஜி.பி.எஃப் கணக்குகள் மாநில கணக்காயர் (Accountant General) வழியாகவும் பராமரிக்கப்படுகிறது.

. மத்திய அரசு ஊழியர்களைப் பொறுத்தவரை, 31-12-2013-க்கு முன் அரசுப்பணியில் சேர்ந்தவர்களும், தமிழக அரசுப் பணியில் 31-03-2013-க்கு முன்னதாக இணைந்தவர்களும் மட்டுமே ஜி.பி.எஃப் சந்தாதாரர்களாக இருக்க முடியும். காரணம், பென்ஷன் உள்ள பதவியில் தொடர்பவர்களுக்கு மட்டுமே உரியது இந்த ஜி.பி.எஃப்.

சி.பி.எஃப்

தமிழக அரசுப் பணியாளர்களில் சிலர் 01-04-2003-க்குப் பிறகு அரசுப் பணிக்கு வந்திருப்பார்கள். அவர்களுக்குப் பழைய பென்ஷன் இல்லாமல் போய்விட்டது. அதேபோல், மத்திய அரசு ஊழியரில் சிலரும்கூட 01-01-2004-க்குப் பிறகு பணியில் சேர்ந்த காரணத்தால்தான் பழைய பென்ஷன் முறை இல்லாமல் போய்விட்டது.

ஆனால், மேற்கண்ட தேதிகளுக்கு முன்னரேகூட பென்ஷன் இல்லாத பதவிகள் (Non pensionable) இருந்தன. அத்தகைய பதவியில் சேர்ந்தவர்களுக்கு 1962-ம் ஆண்டு முதல் அமலாக்கம் பெற்றதுதான் சி.பி.எஃப். 01-01-2004-க்குப் பிறகு அரசுப் பணிக்கு வந்தோர் சி.பி.எஃப் உறுப்பினராக ஆக முடியாது.

. பி.பி.எஃப்

மத்திய, மாநில அரசுப் பணியினர், பொதுத்துறை நிறுவனம், தனியார் நிறுவனம் மற்றும் பல்வேறு வணிக அமைப்புகளில் பணிபுரிந்துகொண்டு சம்பளம் பெறுவோருக்கு மட்டுமே இருந்துவந்த பிராவிடன்ட் ஃபண்ட் வசதி 1968-ல் பொதுமக்களுக்கும் பொதுவாக்கப்பட்டது. அதுதான், `பொதுமக்கள் பிராவிடன்ட் ஃபண்ட்’ எனப்படும் பி.பி.எஃப்.

. இந்தியாவில் வசிக்கும் இந்தியக் குடிமக்கள் அனைவரும், இன்றைக்கும் என்றைக்கும் பி.பி.எஃப் உறுப்பினராகலாம். அந்த வகையில் முந்தைய பத்திகளில் குறிப்பிடப்பட்டுள்ள இ.பி.எஃப்., ஜி.பி.எஃப் மற்றும் சி.பி.எஃப் திட்டங்களில் உறுப்பினராகவுள்ள சம்பளதாரர்கள், பி.பி.எஃப்-லும் சேரலாம். சந்தா செலுத்தி வரலாம். அதாவது,

இ.பி.எஃப் + பி.பி.எஃப்

ஜி.பி.எஃப் +பி.பி.எஃப்

சி.பி.எஃப் + பி.பி.எஃப்

வி.பி.எஃப்

`விருப்பத்தின் பேரிலான பிராவிடன்ட் ஃபண்ட்’ என்பதைத்தான் `வி.பி.எஃப்’ என்று குறிப்பிடுகிறார்கள். ஆனால். இ.பி.எஃப்., ஜி.பி.எஃப்., சி.பி.எஃப் போன்று வி.பி.எஃப் ஒரு தனி நிதியமல்ல.

இ.பி.எஃப்-ல் உறுப்பினராகவுள்ள ஓர் ஊழியர் மாதந்தோறும் தனது அடிப்படைச் சம்பளம் + அகவிலைப்படி கூட்டுத்தொகையில் 12% தொகையை இ.பி.எஃப்–க்கு மாதச் சந்தாவாகச் செலுத்த வேண்டும் என்பது கட்டாயம்.

இந்த 12% சந்தா தொகைக்கும் அதிகமான தொகையை தனது இ.பி.எஃப் நிதியத்தில் சந்தாவாகச் செலுத்த விரும்பும் ஊழியர் நிறுவனத்தின் ஒப்புதலுடன் அதிகப்படியான சந்தாவைப் பிடித்தம் செய்யக் கோரலாம். இவ்வாறு 12% சந்தாவுக்குமேல் அதிகமாகச் செலுத்தும் ‘தொகையே’ வி.பி.எஃப் எனப்படுகிறதே தவிர, இப்படி ஒரு தனி பிராவிடன்ட் ஃபண்ட் இல்லை.

. சந்தா தொகை

இ.பி.எஃப் சார்ந்த ஒரு நிறுவனத்தில் அதன் ஊழியர் எண்ணிக்கை இருபதுக்கும் அதிகமாக இருக்குமானால், அந்த நிறுவன ஊழியர்களுக்கு மாதாந்தர இ.பி.எஃப் சந்தா அவர்களது அடிப்படைச் சம்பளம் + அகவிலைப்படியில் 12%. இதே 12% தொகையை நிறுவனமும் செலுத்தும். இந்த 12+12=24% தொகை வரிச்சலுகை பெறும்.

. ஊழியர் விருப்பம் தெரிவித்தால், தனது 100% சம்பளத்தைக்கூட இ.பி.எஃப் சந்தாவாகச் செலுத்தலாம். இவ்வாறு ஓராண்டு முழுவதும் செலுத்தப்படும் சந்தாவுக்கு அதிகபட்சமாக 1.5 லட்சம் வரை வருமான வரிச் சலுகை (பிரிவு 80சி-யின்படி) உண்டு. ஆனால், நிறுவனமானது தனது பங்குக்கு 12 சதவிகிதத்துக்கும் அதிகமாக ஊழியரின் இ.பி.எஃப் கணக்கில் செலுத்தாது. அவ்வாறு செலுத்துமானால் உபரியாகச் செலுத்தப்பட்ட தொகை ஊழியரின் சம்பள வருமானத்துக்கான கணக்காகக் கருதப்படும். வருமான வரிக்குக் கணக்கிடப்படும்.

இருபதுக்கும் குறைவான ஊழியர்களுள்ள நிறுவனத்தில் ஊழியரின் சந்தா மற்றும் நிறுவனம் செலுத்தும் சந்தா தலா 10 சதவிகிதமாக இருக்கும்.

ஜி.பி.எஃப்-க்கு சந்தா என்பது மத்திய-மாநில அரசு ஊழியர்களின் அடிப்படைச் சம்பளம் + தனிச் சம்பளம் + சிறப்புச் சம்பளம் + அகவிலைப்படி ஆகியவற்றின் கூட்டுத்தொகையின் அடிப்படையில் பிடித்தம் செய்யப்படுகிறது. குறைந்தபட்ச சந்தா மத்திய அரசு ஊழியர்களுக்கு 6%, தமிழக அரசு ஊழியர்களுக்கு 12%, அதிகபட்சம் 100% சம்பளத்தையேகூட சந்தாவாகச் செலுத்திவிடலாம். ரூ. 1.5 லட்சம் வரை சந்தா தொகைக்கு வரிச் சலுகை உண்டு. ஜி.பி.எஃப்-ல் உறுப்பினராக உள்ளவர்களுக்கு பென்ஷன் உண்டு என்பதால், அரசுத் தரப்பு பங்குச் சந்தா கிடையாது. மத்திய அரசு ஊழியர்கள் ஓய்வு பெறுவதற்கு மூன்று மாதங்களுக்கு முன்பே சந்தா பிடித்தம் நிறுத்தப்பட்டுவிடும். தமிழக அரசு ஊழியர்களின் ஜி.பி.எஃப் சந்தா அவர்கள் ஓய்வு பெறுவதற்கு நான்கு மாதங்களுக்கு முன்பே நிறுத்தப்பட்டுவிடும்.

. குறைந்தபட்சம் அவர்களது சம்பளத்தில் 10%, அதிகபட்சமாக 100% சம்பளத்தையேகூட சி.பி.எஃப் கணக்கில் சந்தாவாகச் செலுத்திவிடலாம். இவர்களுக்கான அரசுத் தரப்பு சந்தா 10% மட்டுமே. ஓய்வு பெறுவதற்கு முதல் மாதம் வரை சந்தா பிடித்தம் தொடரும். ஊழியர் இசைவு தெரிவித்தால் ஓய்வு பெறும் மாதத்துக்கும் சந்தா பிடித்தம் செய்யப்படும். பி.பி.எஃப், பொதுமக்களுக்கான பிராவிடன்ட் ஃப்ண்ட் என்பதால், சந்தா தொகையை அவர்கள் பி.பி.எஃப் கணக்கு வைத்துள்ள அஞ்சலகம் அல்லது வங்கியில் செலுத்தலாம். தேசியமயமாக்கப்பட்ட வங்கியுடன்கூட ஐ.சி.ஐ.சி.ஐ பேங்க் மற்றும் ஆக்ஸில் பேங்க் போன்ற தனியார் வங்கிகளிலும், ஆன்லைன் மூலமாகவும் சந்தா செலுத்தலாம். ஓராண்டுக்குக் குறைந்தபட்ச சந்தா ரூ.500, அதிகபட்சம் ரூ.1.5 லட்சம்.

. சம்பாதிக்கும் ஒரு குடும்பத் தலைவர் தனக்கும் தனது மைனர் பையனுக்கும் பி.பி.எஃப் கணக்கு தொடங்கலாம். இரண்டு கணக்கிலும் சேர்த்து அதிகபட்சமாக ரூ.1.5 லட்சம் மட்டுமே ஓராண்டு சந்தாவாகச் செலுத்த முடியும். இவரது மனைவியும் சம்பாதிப்பவராக இருந்தால் அவரும் தனக்கு ஒரு கணக்கும், தன் மகளுக்கு ஒரு கணக்கும் தொடங்கலாம். இரண்டுக்குமான வருடாந்தர சந்தா வரம்பு ரூ.1.5 லட்சம் மட்டுமே. சம்பாதிக்கும் கணவர், சம்பாதிக்கும் மனைவிக்கு கணக்கு தொடங்க முடியாது. ஆண்டு ஒன்றுக்கு 12 முறை மட்டுமே சந்தா செலுத்தலாம் என்ற கட்டுப்பாடு தற்போது கிடையாது. எத்தனை முறை வேண்டுமானாலும் சந்தா செலுத்தலாம். சந்தா தொகை ரூ.50-ன் மடங்குகளாக இருக்கலாம் என்பது புதிய விதிமுறை.

வட்டி விகிதம்

வட்டி விகிதத்தைத் தீர்மானிப்பதிலும், தீர்மானித்த வட்டி விகிதத்தை அறிவிப்பதிலும் இ.பி.எஃப் இதர பிராவிடன்ட் ஃபண்டுகளிலிருந்து வேறுபடுகிறது. எப்படியெனில், இ.பி.எஃப் நிதியத்துக்கான வட்டி, நிதியத்தின் மத்திய அறங்காவலர் வாரியத்தால் (Central Board of Trustees) பரிந்துரைக்கப்பட்டு, மத்திய அரசால் ஏற்றுக் கொள்ளப்பட்டு அறிவிக்கப்படுகிறது.

. அதுமட்டுமல்ல, நிதியாண்டு ஏறக்குறைய முடிவுற்ற பிறகு வட்டிவிகிதம் தெரியவரும். நிர்ணயிக்கப்படும் வட்டி விகிதம் அந்த நிதியாண்டு முழுவதுக்கும் பொருந்தும். நிறைவு பெற்ற நிதியாண்டுக்கான இ.பி.எஃப் வட்டி 8.5%. ஜி.பி.எஃப், சி.பி.எஃப்., பி.பி.எஃப் போன்றவற்றுக்கான வட்டி மத்திய அரசின் நிதியமைச்சகத்தால் நிர்ணயிக்கப்படுகிறது. 01-04-2016 முதல் வட்டி விகிதம் ஒவ்வொரு காலாண்டுக்கும் அறிவிப்பு செய்யப்படுகிறது. காலாண்டு தொடக்கத்திலேயே வட்டி விகிதம் அறிவிக்கப்படுகிறது. அந்த வகையில், ஜி.பி.எஃப்., சி.பி.எஃப்., பி.பி.எஃப் ஆகியவற்றுக்கான தற்போதைய வட்டி விகிதம் 7.1% இதில் கவனிக்க வேண்டிய அம்சம், 01-04-1986 முதல் ஜி.பி.எஃப்-க்கான வட்டியே பி.பி.எஃப்-க்கும் தரப்பட்டுவருகிறது.

பென்ஷன்

பிராவிடன்ட் ஃபண்டுகளில் பென்ஷன் தரும் ஒரே பி.எஃப்., இ.பி.எஃப் மட்டுமே. அதுமட்டுமல்ல, 2003-க்குப் பிறகு வேலைக்கு வருபவர்களில் பென்ஷன் பெறுவோர் ராணுவத்தினரும் இ.பி.எஃப் ஊழியரும் மட்டுமே. நிறுவனம் செலுத்தும் 12% சந்தாவில் 8.33% சதவிகிதத்தைக்கொண்டு இ.பி.எஃப் பென்ஷன் தரப்படுகிறது. 58 வயது நிறைவும், 10 வருடப் பணி பூர்த்தியாவதும் பென்ஷன் பெற பொதுவான தகுதி. பணிக்காலம் குறைவாக இருந்தால் பென்ஷன் குறைவாக இருக்கும். குடும்பப் பென்ஷன் உண்டு. தற்போது குறைந்தபட்ச பென்ஷன் 1,000 ரூபாயாக உள்ளது. இது காலப்போக்கில் அதிகரிக்கப்படும்.

காப்பீடு

பணிக்காலத்தில் இறந்துபோகும் இ.பி.எஃப் தொழிலாளரின் குடும்பத்துக்கு ரூ.2.5 லட்சம் முதல் ரூ. 6 லட்சம் வரை காப்பீட்டுத் தொகை கிடைக்கும். இதற்கான பிரீமியத்தை நிறுவனம் செலுத்துகிறது. மத்திய அரசின் ஜி.பி.எஃப் திட்டத்தில் அதிகபட்சம் ரூ.60,000 காப்பீடு உண்டு. ஊழியர் பிரீமியம் செலுத்த வேண்டாம். பி.எஃப் உடன் இணைந்த (Deposit Linked) காப்பீடு என்பதால், இறந்துபோகும் ஊழியரின் குடும்பத்துக்குக் காப்பீடு வழங்கப்படுகிறது.

முதிர்வுத் தொகை

இ.பி.எஃப்., ஜி.பி.எஃப் மற்றும் சி.பி.எஃப்-களில் ஊழியர் ஓய்வு பெற்ற பிறகும் பி.பி.எஃப்-ல் 15 நிதியாண்டுகள் முடிவடைந்த பின்பும் முதிர்வுத் தொகை பெறலாம். பி.பி.எஃப்-ன் முதிர்வுத் ்தொகையை எடுத்துவிடாமல் ஒவ்வொரு ஐந்து ஆண்டுக்கும் சந்தா செலுத்தியும், செலுத்தாமலும் கணக்கைத் தொடரலாம்!

எதிர்கால வளர்ச்சி... கைகொடுக்கும் ஐ.டி பங்குகள்! - முதலீட்டு வழிகாட்டல்